Hyderabad: సీబీఐ వలలో ఇన్​ కమ్​ టాక్స్​ కమీషనర్​.. ఏకంగా 70 లక్షలు లంచం తీసుకుంటూ..

Hyderabad: లంచం తీసుకుంటుండగా తెలంగాణ ఇన్​ కమ్​ టాక్స్ కమిషనర్​ (ఎగ్జెంప్షన్స్​) జీవన్​ లాల్​ లావుడ్యాను సీబీఐ అధికారులు అరెస్ట్​ చేశారు. ఆయనతోపాటు మరో నలుగురిని కూడా అదుపులోకి తీసుకున్న సీబీఐ అధికారులు లంచంగా తీసుకున్న 70లక్షల రూపాయలను స్వాధీనం చేసుకున్నారు. అనంతరం వేర్వేరు ప్రాంతాల్లో సోదాలు జరిపి మరో 69లక్షల రూపాయల నగదుతోపాటు పలు కీలక డాక్యుమెంట్లను సీజ్​ చేశారు. వివరాలు ఇలా ఉన్నాయి.

జీవన్​ లాల్​ లావుడ్యా హైదరాబాద్​ లోని ఇన్​ కమ్ టాక్స్​ కార్యాలయంలో కమిషనర్​ (ఎగ్జెంప్షన్స్​)గా పని చేస్తున్నారు. దీంతోపాటు అప్పీల్స్ యూనిట్లు 7, 8లకు ఇన్​ ఛార్జ్​ గా అదనపు బాధ్యతలను నిర్వర్తిస్తున్నారు. కాగా, జీవన్​ లాల్​ లావుడ్యా పై అవినీతి ఆరోపణలు రావటంతో సీబీఐ అధికారులు ఆయనపై కొంతకాలంగా నిఘా పెట్టారు.

శనివారం ముంబయిలో 70లక్షల రూపాయల లంచం తీసుకుంటుండగా దాడి చేసి రెడ్​ హ్యాండెడ్​ గా పట్టుకున్నారు. జీవన్​ లాల్​ లావుడ్యా విచారణలో వెల్లడించిన వివరాల మేరకు శ్రీకాకుళంకు చెందిన సాయిరాం పాలిశెట్టి, విశాఖపట్టణానికి చెందిన నట్టా వీర నాగశ్రీ రాంగోపాల్​, షాపూర్​ జీ పల్లోంజీ గ్రూప్​ ఇన్​ కమ్​ టాక్స్​ డీజీఎం (టాక్సేషన్​) విరాల్​ కాంతాలాల్​ మెహతా, ముంబయిలోని చెంబూర్​ కు చెందిన సాజీదా మజహర్​ హుస్సేన్​ షాలను కూడా అదుపులోకి తీసుకున్నారు.

Also read: Shrasti verma: తప్పు లేకపోతే నిరూపించు.. జానీ మాస్టర్ కి ఓపెన్ ఛాలెంజ్ చేసిన శ్రేష్టి వర్మ

ఈ క్రమంలో జీవన్​ లాల్​ లావుడ్యా , అదుపులోకి తీసుకున్న సాయిరాం పాలిశెట్టి, నట్టా వీర నాగశ్రీ రాంగోపాల్​, విరాల్​ కాంతిలాల్​ మెహతా, సాజీదా మజహర్​ హుస్సేన్​ షాలతోపాటు మొత్తం 14మందిపై కేసులు నమోదు చేశారు. మధ్యవర్తులను పెట్టుకుని టాక్స్​ మినహాయింపు కోసం వచ్చే దరఖాస్తులను ఆమోద ముద్ర వేయటానికి జీవన్​ లాల్​ లావుడ్యా పెద్ద మొత్తాల్లో లంచాలు తీసుకున్నట్టుగా విచారణలో వెల్లడైందని సీబీఐ అధికారులు తెలిపారు.

18చోట్ల తనిఖీలు..
అరెస్టుల తరువాత సీబీఐ అధికారులు వేర్వేరు బృందాలుగా విడిపోయి ముంబయి, హైదరాబాద్​, ఖమ్మం, విశాఖపట్టణం, న్యూ ఢిల్లీలోని 18చోట్ల తనిఖీలు జరిపారు. దీంట్లో పలు కీలకమైన డాక్యుమెంట్లతోపాటు 69లక్షల రూపాయల నగదును స్వాధీనం చేసుకున్నారు. తనిఖీలు కొనసాగుతున్నట్టు సీబీఐ వర్గాలు తెలిపాయి. అరెస్ట్​ చేసిన నిందితులను ముంబయిలోని సీబీఐ కేసుల ప్రత్యేక కోర్టులో హాజరు పరచనున్నట్టు పేర్కొన్నాయి.

మాజీ ఎమ్మెల్యే కుమారుడు..
లంచం తీసుకుంటూ పట్టుబడ్డ జీవన్​ లాల్​ లావుడ్యా 2004 బ్యాచ్​ ఐఆర్​ఎస్​–ఐటీ అధికారి, ఖమ్మం జిల్లా వైరా నియోజకవర్గం బీఆర్​ఎస్ మాజీ ఎమ్మెల్యే మదన్​ లాల్​ కుమారుడు.